Noticias
A Universidade de Vigo e a Consellería de Educación, Ciencia, Universidades e FP asinaron este xoves en Ourense dous convenios de colaboración. A través deles, a Xunta de Galicia destinará 6,36 millóns de euros para desenvolver o Campus Auga, o proxecto de especialización do campus de Ourense, e construír un novo edificio para a súa Escola de Enxeñaría Aeronáutica e do Espazo. Estes acordos elevan a 21 millóns de euros o investimento feito ata agora no campus de Ourense para avanzar na súa estratexia de crecemento arredor destes eidos.
A sinatura, que tivo lugar no edificio Campus Auga do campus de Ourense, correu a cargo de Manuel Reigosa, reitor da Universidade de Vigo, e Román Rodríguez, conselleiro de Educación, Ciencia, Universidades e Formación Profesional da Xunta de Galicia, contando ademais coa asistencia, entre outros, do secretario xeral de Universidades, Alberto Díaz; a subdirectora xeral de Promoción Científica e Tecnolóxica, Irene Bonome; dos vicerreitores da UVigo e da súa secretaria xeral Francisco Javier Rodríguez, Belén Rubio e María José Bravo, respectivamente, e do director do Campus Auga, Roberto Ignacio Fernández.
Este mércores e xoves o campus de Ourense abre as súas portas ao alumnado preuniversitario coa celebración da xornada Coñece o campus de Ourense. Nela, arredor de 900 rapazas e rapaces (450 cada un dos días) de Bacharelato de centros educativos da provincia e a súa contorna teñen a oportunidade de coñecer de primeira man as súas instalacións e as titulacións que nel se ofrecen.
A actividade, que dá continuidade a outras similares celebradas o pasado ano, está organizada pola Vicerreitoría do Campus de Ourense co apoio da Vicerreitoría de Estudantado e Empregabilidade da Universidade de Vigo. A programación arrancou este mércores cunha benvida conxunta no edificio Politécnico. Nela, Francisco Javier Rodríguez, vicerreitor do campus de Ourense, agradeceu ao alumnado, profesorado e centros educativos asistentes o esforzo de achegarse a coñecer este campus.
Despois das vacacións de Nadal, este mércores o campus de Ourense retomou a súa actividade e fíxoo, entre outras cousas, coa celebración da primeira sesión deste 2025 do seu Consello de Campus. Entre os temas abordados tiveron un protagonismo destacado a nova licitación para construír o edificio para a Escola de Enxeñaría Aeronáutica e do Espazo, que se agarda facer neste comezo de ano; a “exitosa” execución do primeiro ano de acreditación do Campus Auga e os resultados de investigación da Universidade de Vigo.
A sesión arrancou cun informe de Manuel Reigosa, reitor da Universidade de Vigo, no que fixo un repaso dos principais temas de interese da institución académica desde a última xuntanza do Consello de Campus de Ourense. Entre eles destacou a citada licitación para a construción dun novo edificio no campus de Ourense, o destinado á Escola de Enxeñaría Aeronáutica e do Espazo. A primeira licitación realizada pola UVigo, cun custo total con IVE previsto de arredor de 8,3 millóns de euros, quedou deserta o pasado ano. Actualmente, sinalou o reitor, “estamos rematando as solucións para licitalo, cun custo máis axustado, a finais deste mes de xaneiro ou febreiro, de xeito que se poida executar a obra este ano”. A nova licitación agárdase que ascenda a arredor de 10,3 millóns de euros, procedentes nun 60% do convenio de novas infraestruturas da Xunta de Galicia e nun 40% de fondos propios da UVigo que xa están reflectidos nos orzamentos deste ano.
462 estudantes da UVigo, 239 do campus de Vigo, 123 do de Ourense e 100 de Pontevedra, cursarán parte ou a totalidade deste curso 2024-2025 nunha universidade estranxeira. A través de programas como Erasmus, ISEP, GE4 ou de bolsas propias da Universidade de Vigo, 275 mulleres, 183 homes e catro persoas que non se identifican cos xéneros anteriormente citados, decidiron abandonar as aulas dos campus de Ourense, Pontevedra e Vigo e continuar os seus estudos en universidades de países tan diversos como Corea, Letonia, Turquía, Colombia, Alemaña, México, EE.UU, Romanía ou Arxentina.
A maioría do alumnado, que contou co asesoramento da Oficina de Relacións Internacionais da UVigo para marchar ao estranxeiro, fíxoo a través do programa Erasmus, 434 (256 mulleres, 174 homes e 4 sen xénero determinado); outros 20 con bolsas propias ou accións como a KA131; seis con ISEP e outros dous con GE4. Os e as beneficiarias de bolsas propias son 13 mulleres e sete homes, dos que 15 son do campus de Vigo, tres de Ourense e dous de Pontevedra. Neste caso, a Facultade de Ciencias do Mar do campus de Vigo é o centro que máis alumnado enviou con esta acción que ten como destinos Colombia, Arxentina, Chile, China, Corea, México e Uruguai. No caso do ISEP, dos seis participantes que viaxan a EEUU, cinco son mulleres e un, home, e por campus, catro son do de Ourense e dous de Vigo. Co GE4 dous estudantes viaxaron a Alemaña, unha alumna e un alumno, ambos estudantes da EEI do campus vigués.
O Instituto de Física e Ciencias Aeroespaciais (Ifcae) da Universidade de Vigo amplía as súas capacidades converténdose en operadora de drons autorizada pola Agencia Estatal de Seguridad Aérea (AESA). Esta autorización, acadada en colaboración coa Vicerreitoría de Investigación, Transferencia e Innovación da UVigo, permitiralle “desempeñar un rol destacado no desenvolvemento e a expansión de actividades de investigación e transferencia con vehículos aéreos non tripulados”.
Dentro do Ifcae, os profesores Higinio González e Fernando Veiga, líderes do Laboratorio de Sistemas Aeroespaciais e de Transporte (Aerolab) da UVigo, serán os responsables da administración da operadora. “Este grupo de investigación especializouse na robótica aérea e no desenvolvemento de tecnoloxías vinculadas aos drons. Grazas á súa experiencia e coñecemento neste ámbito, poderemos xestionar e optimizar o uso dos drons para os múltiples proxectos nos que o instituto participa”, sinalan os profesores. Os pilotos autorizados, encargados da operación directa dos drons, serán Eduardo Ríos e Gabriel Fontenla, membros tamén do Ifcae e de Aerolab. “Eles recibiron formación especializada e contan coa certificación requirida para pilotar as aeronaves, o cal garante a seguridade e a eficiencia en cada unha das misións que se realicen”, apuntan desde o instituto.
105%. Esta é a taxa de ocupación que este curso 2024-2025 acadaron as prazas de novo ingreso nos 68 graos ofertados pola UVigo. A institución académica viguesa ofreceu 3836 prazas e cubríronse 4011 (2118 mulleres e 1893 homes), o que sitúa a taxa de ocupación nun 105%, que no caso dos campus ascende a 107% en Pontevedra, acada o 104% en Vigo e sitúase en 103% en Ourense. Unhas cifras que consolidan unha subida continuada da matrícula e nas taxas de ocupación nas prazas de grao de novo ingreso nos últimos anos, pasándose de 3728 persoas matriculadas e unha taxa de ocupación do 98% no curso 2021-2022 aos 4011 matriculados e unha taxa de ocupación do 105% este curso.
“En titulacións de grao este ano batemos récords de matrícula e iso tendo en conta a ampla oferta que hai actualmente, tanto en universidades públicas, como privadas”, sinala Natalia Caparrini, vicerreitora de Estudantado e Empregabilidade, que considera que este éxito se debe a que “por fin estamos chegando a transmitir ao estudantado preuniversitario, ás súas familias e á sociedade en xeral, que a UVigo ofrece titulacións de interese, renovadas e demandadas e que é unha universidade sólida, moderna, dinámica e sobre todo, de calidade, e isto fai que os preuniversitarios xa non teñan inquedanza en facer os seus estudos fóra da súa contorna. De feito o 91% do estudantado matriculado na UVigo é de Galicia, o que creo que reflicte que aquí lles ofrecemos a docencia e a vida universitaria que queren”.
A Universidade de Vigo e a Consellería de Medio Ambiente e Cambio Climático da Xunta de Galicia asinaron este venres un convenio de colaboración para o desenvolvemento dun proxecto de acción contra o cambio climático. Concretamente, ao seu abeiro desde a institución académica realizarase o deseño dunha metodoloxía para a elaboración de mapas de calor e a localización de refuxios climáticos nos concellos galegos atendendo ás necesidades de biodiversidade.
O convenio foi asinado no campus de Ourense por Manuel Reigosa, reitor da Universidade de Vigo, e Ángeles Vázquez, conselleira de Medio Ambiente e Cambio Climático, asistindo tamén Francisco Javier Rodríguez Rajo, vicerreitor do Campus de Ourense; Paula Uría, directora Xeral de Enerxías Renovables e Cambio Climático; Manuel Pardo, delegado da Xunta en Ourense, e Pedro Orgeira, persoal docente e investigador da Escola de Enxeñaría Aeronáutica e do Espazo e do Aerospace Technology Research Group (ATRG)-atlanTTic da UVigo, responsable do proxecto.
Alumnado de terceiro curso da Escola de Enxeñaría Aeronáutica e do Espazo do campus de Ourense desenvolveron nas últimas semanas un proxecto de innovación docente que consistiu nunha competición de deseño e lanzamento de paracaídas. O obxectivo foi que, traballando en grupo e co aliciente de competir, aplicasen nun caso práctico contidos e competencias da materia Mecánica de Fluídos 2 e Dinámica de Fluídos Computacional, do Grao de Enxeñaría Aeroespacial.
A actividade estivo coordinada polo profesor da escola Eduardo Suárez Porto e foi realizada no marco do Grupo de Innovación Docente CFD Aplicado á Docencia, que ten como propósito explorar as capacidades da dinámica de fluídos computacional como ferramenta de axuda na aprendizaxe. Concretamente, no concurso de paracaídas participaron 65 alumnas e alumnos, organizados en 18 grupos de traballo. Cada grupo tivo que deseñar e construír un paracaídas funcional, con total liberdade construtiva salvo unha limitación na superficie máxima dispoñible e apoiándose nos seus coñecementos de dinámica de fluídos computacional.
A Escola Superior de Enxeñaría Informática do campus de Ourense acolleu este mércores a celebración dunha xornada que baixo o título Ciclo Enxeñaría Dixital reuniu a representantes de empresas e persoal investigador da UVigo para “coñecer e debater unha visión actual do uso de solucións dixitais en ámbitos industriais”.
O acto estivo organizado polo Instituto de Física e Ciencias Aeroespaciais (Ifcae) da Universidade de Vigo, que ten a súa sede no campus de Ourense, e contou coa participación desde o eido industrial de Navantia, Reganosa e Sertogal. O acto estivo coordinado polo membro do citado instituto Francisco Javier Rodríguez, que na inauguración apuntou que este ciclo, que nace con vocación de continuidade, constitúe “unha oportunidade de ter unha visión de distintas industrias, desde a enerxía ao naval, onde se empregan tecnoloxías e ferramentas tecnolóxicas de última xeración”.