Noticias
O congreso internacional que celebra periodicamente o Campus Auga, o proxecto de especialización do campus de Ourense arredor dos recursos hídricos e a agroalimentación, xa ten datas e temática. A súa sexta edición terá lugar os días 8 e 9 de outubro e nesta ocasión centrarase na innovación aeroespacial aplicada á xestión ambiental e agraria.
Este VI Congreso Internacional do Campus Auga, que ten por lema Sistemas aeroespaciais para respostas multisectoriais ante desafíos ambientais, está organizado pola Escola de Enxeñaría Aeronáutica e do Espazo e a Vicerreitoría do Campus de Ourense e promovido polo Campus Auga, proxecto de especialización acreditado e financiado pola Consellería de Cultura, Educación, Formación Profesional e Universidades da Xunta de Galicia. Conta ademais co patrocinio da Deputación de Ourense. “Nun escenario global marcado pola presión sobre os recursos naturais, a intensificación dos fenómenos climáticos extremos e a necesidade de avanzar cara a modelos de desenvolvemento máis sostibles, este congreso propón unha mirada integradora e estratéxica sobre o potencial das tecnoloxías aéreas e espaciais”, sinalan desde o comité organizador, presidido por Francisco Javier Rodríguez, vicerreitor do campus de Ourense, e Nieves Lorenzo, directora da Escola de Enxeñaría Aeronáutica e do Espazo.
A Escola de Enxeñaría Aeronáutica e do Espazo do campus de Ourense celebrou este venres o seu III Foro Alumni. Nel, egresadas e egresados do centro volveron a el para contarlle ao seu actual alumnado como está sendo as súas traxectorias profesionais. A actividade estivo organizada con motivo do 12 de abril, Día Internacional dos Voos Espaciais Tripulados, destacando a directora do centro, Nieves Lorenzo, a pertinencia desta celebración tendo en conta o lanzamento estes días da misión á Lúa Artemis II.
O acto arrancou dándose a coñecer a resolución do concurso fotográfico da Escola de Enxeñaría Aeronáutica e do Espazo Aerovisión 2026. Nel convidábase ás persoas interesadas a presentar as súas mellores imaxes no ámbito aeronáutico e/ou espacial. En total presentouse unha vintena de obras, concedéndose tres galardóns. O primeiro premio, dotado cun dron, foi para o fotoxornalista Iñaki Abella, pola fotografía Línea de fuego. O segundo, dotado cun telescopio, recaeu en José Luis Neira, pola imaxe La Patrulla Águila. Por último, concedeuse un terceiro premio, dotado cuns prismáticos, a Nicolás Outón, pola peza Air Canada Vortex.
49 estudantes da Universidade de Vigo integran a día de hoxe UVigo SpaceLab. Mentres ultiman o proxecto BIXO, Bacteriological Intercommunication eXperiment in Orbit, un CubeSat de dúas unidades que levará a bordo unha carga biolóxica para estudar como a microgravidade e a radiación afectan aos procesos de comunicación bacteariana, o equipo está inmerso nun proceso de ampliación, que se prolongará ata o 19 de abril. “O obxectivo é atraer a novos estudantes para garantir a remuda xeracional, manter o coñecemento e que este non se perda”, explica Daniel Collarte, responsable de Marketing e Manager Lead do equipo, que destaca “que non só buscamos enxeñeiros, senón que poderían formar parte do equipo estudantes doutra carreiras que poden ser útiles no ámbitos administrativos, de deseño ou comunicación”.
Este proceso de ampliación coincide cun momento que os integrantes do equipo cualifican de “decisivo, co lanzamento de BIXO que se realizará en próximos meses” , unha circunstancia que permitirá ás novas incorporacións vivir o lanzamento, e, “o máis importante, o desenvolvemento de novas misións, punto moi importante, xa que o interese da asociación, non só é o proxecto BIXO, senón crear un equipo no que estudantes de todas as carreiras poidan poñer en práctica todos os coñecementos adquiridos durante a carreira e claramente ampliar o seu ámbito de coñecemento”.
A Escola de Enxeñaría Aeronáutica e do Espazo do campus de Ourense e a delegación en Galicia da Ellas Vuelan Alto, entidade que fomenta a igualdade no sector aeroespacial, organizaron este venres a mesa redonda Retos espaciais desde a innovación e a ciencia. Nela, representantes de diferentes entidades que forman parte do ecosistema espacial dialogaron sobre como “Galicia, España e Europa afrontan os desafíos dun sector espacial cada vez máis competitivo e tecnolóxico”.
A xornada arrancou cunha benvida a cargo de Silvia Vela, directora legal e de expansión de EVA e responsable da delegación en Galicia desta entidade, que puxo en valor a relevancia da temática abordada nesta sesión. Seguiulle a apertura a cargo de Eva D. Castro, presidenta de ONU Mujeres España, que destacou, entre outros aspectos, a importancia de fomentar a participación das mulleres tamén no sector espacial, apuntando que “non hai innovación sen igualdade nin futuro máis sostible sen xustiza”.
Case 400 rapazas e rapaces da provincia de Ourense participaron este venres no campus de Ourense na novena edición da feira eXXperimenta en Feminino, a gran cita anual coa divulgación científica e co fomento da igualdade no eido CTEM (ciencias, tecnoloxía, enxeñaría e matemáticas) do campus de Ourense. A iniciativa é froito do traballo e do compromiso dun amplo colectivo de persoal docente e investigador da UVigo, principalmente mulleres, que queren contribuír a rachar os teitos de cristal neste eido: a falta de referentes femininos científicos na sociedade e a desproporción entre homes e mulleres nas carreiras científico-tecnolóxicas.
A feira celébrase no edificio Politécnico co gallo do 11 de febreiro, Día Internacional da Muller e da Nena na Ciencia, e nela participan arredor de 150 investigadoras e investigadores, maioritariamente mulleres, da Facultade de Ciencias, da Escola Superior de Enxeñaría Informática e da Escola de Enxeñaría Aeronáutica e do Espazo. Conta co apoio de, ademais dos centros implicados, do Campus Auga; das unidades de Cultura Científica e de Igualdade da UVigo e da Consellería de Educación, Ciencia, Universidades e Formación Profesional. Pola mañá estivo aberta aos centros educativos que reservaron praza (14 grupos de estudantado preuniversitario de Ourense cidade, Xinzo de Limia, Bande e Allariz) e a partir das 14.00 h ao público en xeral, xa con entrada libre.
12 rapazas son as gañadoras do X Concurso de Creación Artística do Día Internacional da Muller e a Nena na Ciencia. Trátase dunha iniciativa da Facultade de Ciencias, a Escola de Enxeñaría Aeronáutica e do Espazo e a Escola Superior de Enxeñaría Informática do campus de Ourense que ten como obxectivo axudar a que se visualice o papel das mulleres na ciencia e na enxeñaría e chamar a atención do alumnado sobre a ciencia, a enxeñaría e a súa contorna. Nesta edición presentáronse arredor de 150 traballos duns 15 centros educativos da provincia de Ourense, agradecendo e destacando desde a organización da iniciativa esta boa acollida e o esforzo feito polo alumnado participante.
O certame, que conta co apoio da Unidade de Igualdade da Universidade de Vigo, busca promover o coñecemento por parte da rapazada do papel das mulleres na ciencia e na enxeñaría e as súas achegas ao desenvolvemento humano ao longo da historia. Cada ano organízase no marco das actividades do 11 de febreiro, Día Internacional da Muller e da Nena na Ciencia. Neste edición convidábase ao alumnado de Primaria e Secundaria da provincia a presentar creacións orixinais en formato visual ou literario.
O venres 20 de febreiro o campus de Ourense celebra unha nova edición, a novena, da súa gran cita anual coa divulgación científica e co fomento da igualdade no eido CTEM (ciencias, tecnoloxía, enxeñaría e matemáticas). Trátase da feira eXXperimenta en Feminino, que cada ano mobiliza un amplo colectivo de persoal docente e investigador da UVigo, principalmente mulleres, co obxectivo de contribuír a rachar dous teitos de cristal neste eido: a falta de referentes femininos científicos na sociedade e a desproporción entre homes e mulleres nas carreiras científico-tecnolóxicas.
A feira, que se desenvolve no edificio Politécnico, organízase co gallo do 11 de febreiro, Día Internacional da Muller e da Nena na Ciencia, e nela participa arredor de 150 investigadoras e investigadores, maioritariamente mulleres, da Facultade de Ciencias, da Escola Superior de Enxeñaría Informática e da Escola de Enxeñaría Aeronáutica e do Espazo. Ademais conta co apoio de, ademais dos centros implicados, do Campus Auga; das unidades de Cultura Científica e de Igualdade da UVigo e da Consellería de Educación, Ciencia, Universidades e Formación Profesional. Pola mañá estará aberta aos centros educativos que reservaron praza (14 grupos de estudantado preuniversitario de Ourense cidade, Xinzo de Limia, Bande e Allariz) e a partir das 14.00 h ao público en xeral, xa con entrada libre.
O campus de Ourense acolleu este xoves a conferencia Illa de calor e incendios: unha aproximación dende a teledetección, ofrecida por José Sobrino, catedrático de Física da Terra da Universidade de Valencia, experto en teledetección e líder da fase de consolidación da misión térmica SIRIUS da Axencia Espacial Europea (ESA). O acto estivo organizado polo Instituto de Investigación en Física, Computación e Ciencia Aeroespacial e o Instituto de Agroecoloxía e Alimentación da UVigo, co apoio da Escola de Enxeñaría Aeronáutica e do Espazo, a Facultade de Ciencias e o Campus Auga.
De orixe galega, José Sobrino abordou a temática da conferencia a partir da experiencia nela de 40 anos do seu grupo de investigación na Universidade de Valencia, onde actualmente é director da Unidade de Cambio Global. Así falou de traballos feitos arredor da detección de incendios, sobre todo da súa extensión e severidade e da evolucion das zonas afectadas, como foi no caso dos incendios acontecidos en Ourense no mes de agosto. Igualmente explicou ao alumnado e persoal docente e investigador presente o uso da teledetección en illas de calor, é dicir ao feito de que “a temperatura na cidade, durante a noite fundamentalmente, é maior que na zona dos arredores, xa que os materiais que configuran a cidade feitos polo home, como o cemento, o asfalto, etc. absorben calor de día e libérano durante a noite, o que e fai que aumente esa temperatura”. Con datos de satélite, indicou, “pódense detectar eses graos de variación entre a zona urbana e os arredores”. Neste punto o convidado explicou que “presentamos un proxecto á Axencia Espacial Europea, unha misión científica que ten como obxectivo o estudo do efecto illa de calor co lanzamento dun satélite puramente destinado a iso”. O satélite chámase SIRIUS e “é unha fase de consolidación, despois de oito meses traballando no proxecto presentamos hoxe mesmo o informe final e en marzo defenderémolo na ESA xunto a outros proxectos, dos que se elixirán dous para lanzar ao espazo”.
A Escola de Enxeñaría Aeronáutica e do Espazo do campus de Ourense ten convocada a cuarta edición do seu certame de fotografía AeroVision. Nel convídase ás persoas interesadas a presentar as súas mellores imaxes no ámbito aeronáutico e/ou espacial. A iniciativa celébrase co gallo da conmemoración do Día Internacional dos Voos Espaciais Tripulados e do Día da Cosmonáutica o 12 de abril.
Cada persoa pode participar cun máximo dunha obra, tendo que ser orixinal e inédita e non presentada con anterioridade noutros concursos, webs ou calquera outro medio dixital ou impreso. As imaxes deben amosar situacións, paisaxes ou circunstancias relacionadas co ámbito aeronáutico e/ou aeroespacial. Admítense obras en branco e negro e en cor realizadas mediante calquera técnica fotográfica. As propostas teñen que enviarse ao enderezo electrónico